Есөн нам Хэнтийн нөхөн сонгуульд оролцох хүсэлтээ өглөө

Есөн нам Хэнтийн нөхөн сонгуульд оролцох хүсэлтээ өглөө

Ардчилсан нам, Монгол Ардын нам, Монгол Ардын Хувьсгалт нам, Хөдөлмөрийн үндэсний нам зэрэг есөн нам Хэнтий аймгийн 42-р тойргийн нөхөн сонгуульд оролцохоо хүсэлтээ СЕХ-нд албан ёсоор хүргүүллээ. Сонгуулийн хуулийн дагуу намууд нөхөн сонгуульд оролцох хүсэлтээ өгөх хугацаа өнөөдөр дуусгавар болж байгаа юм. Харин Сонгуулийн ерөнхий хороо хуулийн дагуу нөхөн сонгуульд оролцох боломжтой намуудад батламж гардуулдаг бөгөөд энэ хугацаа нь тавдугаар сарын 5-ны өдөр дуусгавар болно.

МАН-ын бүлгийн дарга Д.Тогтохсүрэн “Хэнтий аймгийн 42-р тойргийн нөхөн сонгуульд оролцох хүсэлтээ албан ёсоор хүргүүлж байна. Нэр дэвшигчийг намын Бага хурал хуралдаж, тавдугаар сарын 25-28-ны өдрүүдэд шийдвэрлэнэ. Ер нь хэн гэдэг нэр дэвшигчийг бүртгүүлэх вэ гэдгээ ярилцаж, судалж байгаа. Дахин Бага хурлаараа шийдвэрлэнэ. Хэнтий аймгийн 42-р тойргийн сонгууль улс төрийн намууд, улстөрчдийн рейтинг тогтоосон сонгууль болно гэж бодож байгаа учраас МАН хариуцлагатай оролцоно” гэлээ.

Мөн МАХН-ын ерөнхий нарийн бичгийн дарга Б.Тулга “42-р тойргийн нөхөн сонгууль бол 2016 оны 60 тэрбум, 2017 оны мөнгөн дээр тогтсон сонгууль явуулж болохгүй гэдгийг онцлон хэллээ. Удахгүй МАХН-ын Бага чуулганыг хуралдуулж, нэр дэвшигчээ тодруулж, мөн хуулийн хугацаанд нэр дэвшигчээ Сонгуулийн ерөнхий хороонд бүртгүүлнэ” гэлээ. МАХН-аас Хэнтий аймгийн нөхөн сонгуульд Хэнтий аймгийн МАХН-ын дарга С.Ононбаяр, намын дэд дарга С.Ганбаатар, намын дарга Н.Энхбаяр нарыг нэр дэвшүүлэхээр яригдаж байгаа аж. Нэр дэвшигчийг тавдугаар сарын 28-ны өдөр тодруулж, СЕХ-нд бүртгүүлэх ёстой.