Сар бүрийн эхэнд иргэд ЭМД-ын хөнгөлөлттэй эм худалдан авах гэж уртаас урт дараалал үүсгэдэг. Ялангуяа ахмад настнууд өглөө тав, зургаан цагаас эхлэн эмийн санд дугаарлаад гар хоосон буцах тохиолдол олон. Учир ЭМД-ын хөнгөлөлтөөр олгох эмийг сарын эхний өдрүүдэд, тодорхой цөөн тооны эмийн сангуудаар олгодог нь ийм хүндрэл үүсгэдэг аж. Тэгвэл энэ байдал удахгүй арилах нь. Тодруулбал, ирэх 11-р сарын нэгнээс даатгуулагчдад хөнгөлөлттэй эмийн жагсаалтад багтсан эмийг бүтэн сарын турш өөрт ойрхон дурын эмийн сангаас авах боломжтой боломжтой болох юм байна.
Түүнчлэн иргэд өмнө нь зөвхөн өрхийн эмчийн бичсэн жороор эмээ хөнгөлөлттэй авдаг байсан бол аль ч шатлалын эмнэлгийн эмчээр эмийн жороо бичүүлж авдаг болох юм байна. Ирэх сарын нэгнээс хэрэгжих энэ журамд мөн эмийн хөнгөлөлтийн хувь хэмжээнд өөрчлөлт орно гэдгийг ЭМЯ-ийн хэлтсийн олон нийттэй харилцах хэлтсийн ахлах мэргэжилтэн Б.Түвшинжаргал хэллээ. Мөн хөнгөлөлттэй эмийн жагсаалтад өөрчлөлт орно гэдгийг ч эх сурвалж дурдсан юм. Иргэд, даатгуулагчиддаа ийнхүү уян хатан, таатай нөхцөлийг бүрдүүлж, эмийг бүтэн сарын турш олгох энэ журам олон нийтэд хүлээлт үүсгэсэн шийдвэр байсан юм.
Э.Сэлэнгэ